Emisión da TVG sobre Paz Andrade

A obra de Valentín Paz-Andrade, o homenaxeado deste ano no Día das Letras Galegas, vai ser emitida pola televisión pública do país a partir do vindeiro luns, a través dunhas pezas audiovisuais elaboradas dos seus poemas máis significativos.
Trátase dun total de 6 pezas breves e máis unha versión máis ampla na que se inclúe todo o conxunto, que foron elaboradas a partir dos versos do autor e que teñen como obxectivo dar a coñecer entre a cidadanía a súa produción poética.
O secretario xeral de Cultura, Anxo Lorenzo, asegurou que dende a entidade que preside comparten a idea de incorporar estas pílulas poéticas, de breve duración, “para que a proposta cultural non se produza só en formatos para públicos específicos xa interesados na produción literaria, senón para convertela nunha proposta que chegue ao conxunto da poboación nas formas televisivas de consumo habitual, case en formato de anuncio”, insistiu.
Os poemas audiovisuais sobre os versos de Paz-Andrade, que foron realizados por Algarabía Animación, enmárcanse no programa de actividades co que a Xunta de Galicia contribúe coa conmemoración do Día das Letras Galegas 2012 e que pode consultarse na súa web oficial.