ROSALÍA. 175 aniversario do nacemento

Esta é unha entrada moi especial; o noso blog chega á entrada 300 que reservamos para ocupar celebrando o 175 aniversario de Rosalía (1837-1885). Este ano propoñemos un roteiro virtual  (tamén desde a páxina da Fundación Rosalía de Castro) e a lectura de interesantes artigos por medio destes enlaces:
 

• 24 de febreiro, Día de Rosalía de Castro

• Unha Rosalía “inédita” 

• “Rosalía era a voz dos silenciados, das maltratadas, da lingua, era a voz que falaba por todos”

   

  E pasamos á publicidade:

Día de Rosalía

Hoxe o alumnado de 2º de ESO, na clase de Lingua Galega, homenaxeou a Rosalia de Castro (Santiago, 24 de febreiro de 1837- Padrón 15 de xullo de 1885). A lectura escollida foi  a composición " Miña Santiña, miña santasa" de Cantares galegos (1863) onde unha mociña, fascinada polo baile de moda, suplícalle a unha santa que lle ensine a bailar. Malia as habilidades  da rapaza "cumprimenteira", a santa  non acepta o negocio;  o diálogo das dúas é a tensión entre o pracer e o deber:

Miña Santiña,
miña Santasa,
miña cariña
de calabasa:
hei de emprestarvos
os meus pendentes,
hei de emprestarvos
o meu collar;
hei de emprestarcho,
cara bonita,
si me deprendes
a puntear.

- Costureiriña
comprimenteira,
sacha no campo,
malla na eira,
lava no río,
vai apañar
toxiños secos
antre o pinar.
Así a meniña
traballadora
os punteados
deprende hora.

(...)

Como a santa non cede á petición, a rapaza acaba moi enfadada:

- ¡Ai, qué Santasa!
¡Ai, qué Santona!
Ollos de meiga,
cara de mona,
pór n'hei de porche
os meus pendentes,
pór n'hei de pórche
o meu collar,
xa que non queres,
xa que non sabes
adeprenderme
a puntear.

 Con algúns cambios - para as obrigas, por exemplo- calquera se pode identificar con esa situación porque as actitudes non cambian.

Pódese ler o poema completo  en http://gl.wikisource.org/wiki/Cantares_gallegos,_1-10, é o texto 5
A Asociación  de Escritores en Lingua Galega organizou, para esta  tarde, unha lectura simultánea de textos rosalianos en distintos lugares do país

Actualización: Rosalía de Castro... vive nas bibliotecas escolares galegas

A voz de Rosalía en Bos Aires

Os versos de Rosalía estarán en Bos Aires na conmemoración do nacemento de Borges

Galicia estará presente con poemas de Rosalía de Castro na iniciativa 'Babel, a biblioteca de poesía', posta en marcha polo Goberno da Cidade de Bos Aires (Arxentina) para celebrar o 'Día do Lector', o vindeiro 24 de agosto, en conmemoración do nacemento do escritor arxentino Jorge Luis Borges.

O obxectivo da proposta é achegar ao espectador a experiencia directa de encontro con diversas linguas propias das colectividades presentes na cidade, realizando lecturas de poemas nos seus idiomas orixinais. Neste contexto, entre o luns 23 e o xoves 26 levaranse a cabo oito presentacións en diversas bibliotecas públicas da cidade autónoma. Así, leranse poemas de Ron Winkler en alemán, de Jaroslav Seifert en checo, de João Cabral de Melo Neto en portugués, de Joãn Brossa en catalán, de Gabriele D’Annunzio en italiano, de William Shakespeare en inglés, de Said Akl en Árabe e de Rosalía de Castro en galego.

A lectura estará a cargo da escritora e xornalista Delfina Blanco, que ofrecerá ao público asistente unha breve presentación da traxectoria da autora galega e lerá catro textos da escritora de Padrón e dúas pezas dedicadas á súa figura por Ramón Cabanillas e Manuel Curros Enríquez.

(de Galiciaé)

Extra: Presentación en Slideshare do parque El Rosedal (Bs. As.) onde está "El jardín de los poetas"

Nota: Algunhas palabras teñen ligazóns; pasa o rato sobre o texto para descubrilas