26 mar. 2011

Falecemento de Valentín Arias

O escritor e traductor Valentín Arias López finou onte na súa casa matriz sarriá de Vilerma a idade de 76 anos. Nacera en Sarria en 1934 e formouse como ensinante. Comezou nos anos 50 a colaborar na prensa e en revistas onde publicaba artigos de temática referente ao campo galego, sector no que se formara logo da súa estancia na Granxa de Barreiros. Da altura de 1969 veñen as súas primeiras relacións e colaboracións coa editorial Galaxia, empresa na que chegaría co tempo a exercer de xerente. No tempo da ditadura, militou no nacionalismo clandestino nas fileiras do PSG e, logo da morte do xeneral Franco formou parte das candidaturas desta organización. Na transición impulsou a entrada deste partido na órbita da Esquerda Galega de Camilo Nogueira.
Arias sería en 1984 membro fundador da Asociación de Tradutores Galegos na que, desde a presidencia que ostentou, contribúe á por en valor o papel da tradución no mundo editorial galego. En 1989 recibiu o premio Ramón Cabanillas de Tradución e mais tamén o Premio de Tradución Xuvenil do Ministerio de Cultura. En 2002 acada o Premio de Tradución Plácido Castro.
Autor en 1993 dun Prontuario ortográfico galego que acadou enorme difusión, elaborou senllas biografías de persoeiros galegos, como Antonio Fernández López e Avelino Pousa Antelo, cos quen tivera unha estreita amistade desde o tempo lucense da granxa experimental de Barreiros. Pai da poeta e tradutora, tamén desaparecida, Xela Arias, o esforzo tradutor de Valentín Arias quedou referendado co proxecto de traducir ao galego o Quixote cervantino que abordaría desde un equipo baixo a súa dirección. (ANT)

Noutros medios:
"Adeus a un pioneiro" GaliciaHoxe 

"A cultura galega despídese do tradutor e escritor Valentín Arias" Xornal

Atlántico Diario

Artigo de Víctor Freixanes en LVG 

No hay comentarios:

Publicar un comentario